07 мая 2003 г.
Районти социаллă ĕçченсем хушшинче “Професси енĕпе чи лайăххине» палăртас тĕллевпе Хурамалти ветерансен çуртĕнче конкурс иртрĕ. Унăн тĕллевĕ - ватăсене социаллă пулăшу парассин пахалăхне лайăхлатасси, пĕр-пĕрин опычĕпе паллашасси, çĕнĕ мелсене аталантарасси. Кăçалхи конкурса Çемье çулталăкне халалланă, вăл “Кашни ветерана - çемье хăтлăхĕ” чĕнÿпе иртрĕ.
Тупăшура çак сферăра ĕçлекенсем малтан хăйсемпе паллаштарчĕç, мĕнле тавракурăмлине кăтартрĕç. Конкурсанткăсем социаллă тивĕçтерÿ йĕркине, ватлăх çулĕсенчи çынсен кăмăл-туйăмĕн хăйнеевĕрлĕхне пĕлнине, пĕрремĕш медицина пулăшăвĕ пама пултарнине çирĕплетрĕç. Вĕсем çавăн пекех кулинари енĕпе те тупăшрĕç.
Пуринчен ытларах - 40 балл илме май пур çĕртен 34 балл пухса - Йĕпреçри ветерансен çуртĕнчи Алевтина Степановапа Елена Ефимова пĕрремĕшпе иккĕмĕш вырăнсене пайларĕç. Хурамалти Валентина Кириллова - виççĕмĕш вырăнта.
Çу уйăхĕн вĕçĕнче Елчĕкре республикăри социаллă ĕçченсен зонăри конкурсĕ иртет, унта тăхăр район хутшăнмалла. Йĕпреç Ен чысне Алевтина Степанова хÿтĕлĕ. Елчĕкри тупăшура малти виçĕ вырăна тухакансем çĕртме уйăхĕнче республикăра социаллă ĕçченсен конкурсĕн финалĕнче вăй виçĕç.